NOVA ANTOLOXÍA DA MÚSICA GALEGA CONTEMPORÁNEA

O colectivo Galeguiza-T, composto por un grupo de estudantes do IES Neira Vilas de Oleiros que participan activamente no Equipo de Dinamización da Lingua Galega do centro, están a difundir nas redes a iniciativa Nova antoloxía da música galega contemporánea, unha lista de Spotify con máis de 200 artistas ou grupos contemporáneos que fan música en galego. O obxectivo é difundir entre a mocidade a riqueza e diversidade da música feita no noso idioma, que abrangue estilos tan variados coma o trap, o reggaeton, o death metal, o heavy, a bachata, a cumbia, o indie ou o jazz, entre outros.

Este artigo foi transcrito de xeito literal da súa fonte, o Consello da Cultura Galega.

XXV ÁLVARO CUNQUEIRO PARA TEXTOS TEATRAIS, XI MANUEL MARÍA DE LITERATURA DRAMÁTICA INFANTIL E XIV BARRIGA VERDE DE TEXTOS PARA TEATRO DE MONICREQUES, EDICIÓN 2020

No DOG núm. 232 do 5 de decembro de 2019 publicouse a RESOLUCIÓN do 25 de novembro de 2019 pola que se establecen as bases reguladoras, en réxime de concorrencia competitiva, e se fai pública a convocatoria para a concesión dos premios XXV Álvaro Cunqueiro para textos teatrais, XI Manuel María de literatura dramática infantil e XIV Barriga Verde de textos para teatro de monicreques, edición 2020 (código de procedemento CT214A).

Existirá un único galardoado por premio e no caso do Premio Barriga Verde, un por cada modalidade, coa seguinte dotación económica:

– Álvaro Cunqueiro: 8.000 €.

– Manuel María: 6.000 €.

– Barriga Verde (modalidade para rapaces): 6.000 €.

– Barriga Verde (modalidade para adultos): 6.000 €.

O prazo de presentación de orixinais estará aberto ata o 4 de maio de 2020.

Máis información no Portal da Lingua Galega.

LEDIGAL

O Instituto da Lingua Galega (ILG) presenta LEDIGAL, un novo recurso web que permite coñecer a variación sociolingüística no léxico dispoñible do galego, entendendo por léxico dispoñible aquel que se presenta na mente dos falantes de xeito inmediato e natural cando se trata de determinado ámbito temático.

A partir dos datos obtidos no traballo Léxico dispoñible do galego (2014), realizado por Belén López Meirama e María Álvarez de la Granja a partir de datos obtidos de 800 estudantes de segundo de bacharelato durante o curso 2008-2009, o ILG elaborou esta aplicación que che permitirá correlacionar os lemas e as variantes concretas escritas polas/polos estudantes con diferentes variables sociais e sociolingüísticas (lingua inicial, lingua habitual, nivel sociocultural, etc.). Para coñecer máis sobre o proxecto, preme aquí. 

Este artigo foi transcrito de xeito literal da súa fonte, o Consello da Cultura Galega.

CONCURSO DE CURTAS SENDA DOS FAROS

A Secretaría Xeral de Política Lingüística da Consellería de Cultura e Turismo e da Dirección Xeral de Educación, Formación Profesional e Innovación Educativa da Consellería de Educación, Universidade e Formación Profesional convocaron o Concurso de Curtas Senda dos Faros.

Poderá participar con vídeos en lingua galega dunha duración máxima de 5 minutos o alumnado dos centros docentes da Consellería de Educación, Universidade e Formación Profesional que impartan ensinanzas sostidas con fondos públicos: ensinanzas de educación secundaria (ESO, bacharelato, formación profesional básica, ciclos formativos de grao medio) e ensinanzas especiais de grao medio.

Establécense tres premios para as tres mellores curtas (que inclúen a asistencia á proxección no festival de Cans), así como premios á mellor actriz, ao mellor actor e especial do público.

O prazo para solicitar a participación no certame rematará o 30 de xaneiro de 2020 e a data límite de envío dos vídeos será o 30 de marzo de 2020.

Pódese consultar a información completa na páxina web www.lingua.gal.

 

REFRANEIRO 'COA PALABRA NA BOCA'

 

O Centro Ramón Piñeiro fomenta o uso didáctico do refraneiro co libro 'Coa palabra na boca'.

 

Publicación de carácter didáctico en formato electrónico, dirixida a todos os niveis de ensino obrigatorio así como a persoas interesadas nos refráns e nos refraneiros galegos. Distínguese unha primeira parte teórica e outra posterior na que se propoñen diferentes actividades didácticas divididas por niveis de ensino. 78 debuxos de José M. Castro Méndez acompañan os textos.

 

Pódese descargar dende a páxina https://cirp.es.

CATÁLOGO DE NADAL

A Mesa pola Normalización Lingüística lanzou, un ano máis, un extenso catálogo con centos de propostas de compras e agasallos de Nadal en galego.

Pódese descargar dende a súa páxina www.amesa.gal.

PALABRA DO ANO

Que termo merece converterse na Palabra do Ano 2019? Achega a túa proposta nesta ligazón.

Trátase dunha iniciativa da RAG e a Fundación Barrié, iniciada alá polo 2014.

A escolla consistirá nun proceso colectivo de tres fases.

Primeira fase

Recepción de propostas. Recolleranse suxestións ata as 23:59 horas do domingo 15 de decembro. Se non te dás decidido por unha, podes mandar varias palabras.

Segunda fase

Ábrese o luns 16 de decembro. De entre todas as propostas rexistradas na fase primeira, elixiranse as palabras máis repetidas ou algunha que represente unha temática compartida por distintas persoas participantes. Poderase votar polas finalistas ata o mércores 25 de decembro ás 23:59 horas.

Terceira fase

Tras recontarmos os votos, o venres 27 de decembro desvelaremos cal é a Palabra do Ano 2019.