CRÉASE A ASOCIACIÓN A3GAL

O sábado 22 de setembro tivo lugar en Santiago de Compostela a constitución da Asociación de Amigas e Amigos da Galipedia e Coñecemento Libre (A³Gal).

Esta asociación operará cos seguintes obxectivos:
 

1. Contribuír a que o saber e a cultura sexan accesibles para todas as persoas, a través da difusión directa de enciclopedias, libros, imaxes e outras compilacións de documentos que se presenten nun formato libre.
 

2. Difundir as obras que fosen liberadas polas persoas autoras destas con licenza libre, é dicir, cun formato libre e gratuíto, de tal xeito que en relación co seu contido, calquera persoa poida acceder, con liberdade para:
- utilizar os contidos e desfrutar dos proveitos do seu uso;
- estudar os contidos e aplicar os coñecementos que se deriven;
- facer copias e volver redistribuílas; e ‘modificar os contidos e facer unha nova distribución das obras derivadas. Todo isto sen prexuízo de que as diversas persoas autoras sigan a ser propietarias das súas obras.
 

3. Converterse nun nodo máis deste intercambio de coñecementos universal, achegando contidos xerados pola nosa propia cultura, e en lingua galega.

A enciclopedia libre en galego pódese consultar en https://gl.wikipedia.org/wiki/Portada

Fonte: Observatorio da Lingua Galega e Código cero